УСТАВ ЛЬВОВСКОЙ БРАТСКОЙ ШКОЛЫ (1586 г.)

В России, как и в некоторых других славянских странах XV - XVI вв., существовали так называемые братские школы, которые основывались религиозно-национальными братствам. Их деятельность была тесно связана с борьбой украинского и белорусского народов против католического и шляхетского гнета.

Одной из первых и наиболее известных была Львовская школа, открытая Ставропигийским братством в 1586 г. Братские школы были также в Киеве, Луцке, Вильнюсе и других городах. Учебно-воспитательный процесс школ регламентировался уставами, в основе которых лежали педагогические принципы, развитые в Уставе Львовской братской школы, текст которого и воспроизводится в хрестоматии.

Порядок школьный

Благоволением бога отца, и со поспешением единароднаго его сына, и действом святаго духа, благословением же советом и повелением святейшаго Иоакима патриархи великоя Антиохия, Киликия, Иверия, Сирия, и всего востоку солнца, сушу ему зде в граде Львове року 1586 месяца Генваря 1 дня.

Совершением же и утверждением вселенскаго Патриархи Иеремии, архиепископа Константинополя новаго Рима и всего Фрону великия церкве Кон'стан'тинопольския, року 1588, составиша училище в граде Львове, при храме успения пречистыя божия матере, греческаго и славенскаго писания, по чину святых богоносных отец, православия греческаго, великою пилностью, стараниям же и накладом (иждивением) всего братства Львовскаго, храма успения пресвятыя богородицы, и всего посполитого народа Российского, даже и до убогих вдовиц промышляючи

52

о всяком недостатку законной науки, нерадивых человек подвизающе, противным же уста загражающе, дабы отсюду злобе изменившеся благих начало восприяти, и по всей братии спасению распространитися: изменение бо злобы, начаток ест в спасение, близь беды спасение.

1. Дидаскал или учитель сея школы мает быти благочестив, разумен, смиреномудрый, кроток, воздержливый, не пияница, не блудник, не лихоимец, не сребролюбец, не гневлив, не завистник, не смехостроитель, не срамословец, не чародей, не басносказатель, не пособитель ересем, но благочестию поспешитель, образ благих, и всем себе преставляющий не в сицевых добродетелех, да будут и ученици яко учитель их.

Мают быти приставлены от братии два человека искусные ради строения школьного, да соглядают науки, и дел дидаскаловых благых и лукавых, еже бо сеет человек, тоже и пожнет. И тым братиям мает быти дан реестр под печатью братскою, в который мают дидаскали вписовати дети данные до науки, и ведлуг лет и науки дитинное мает быти и заплата им, то есть дидаскалом.

А кто бы хотел взяти дети свои от науки, кгды приде квартал, при тых же братиях отпуститися мают порядне, учинивши дидаскалу за то досыть ведлуг постановеня братского, як по чому постановят на квартал дидаскалу давати от хлопца, таковому учителю каждый приводячи сына и приятеля и прочих, да при устех двою или триех станет глаголал, и чинити з дидаскалом постановеня о науце и о всем порядку и повинность его ведле реестру сего ниже писанного; и мает ему напервей той реестр прочитатися, абы ведал яковым способом будут сына его учити, и што за то повинен, и яко бы мел ему в том порядку непрешкажати, але помагати всяким способом детину ку науце, и послушенству дидаскалову приводячи як, правдивый отец, хотячи потеху по праци и накладе благый плод видети, и мает реестр по обычаю вписатися.

2. А дидаскал, взявши порученное ему детище, мает его учити с промыслом доброй науки, за непослушенство карати, не тирански, но учителски, не выше, но по силе, не роспустне, но покойне и смирене, не толико мирски, но и выше мирских, абы теж непилностью своею, или заздростию, или лукавством незостал винен ни за единого богу вседержителю, и потом родичом его и ему самому, кгды бы человека ему зволок; а его от иного забавил, писано бо есть: злый, лукавый, ленивый рабе, по что не отда сребро мое торжником да пришед аз взял бых свое со лихвою; и паки: щадяй жезла ненавидит сына, и аще без наказания были быхом, убо прелюбодейчища бысте были, а не сынове.

3. Седати мают каждый на месци своем певном назначеном ведле науки, который болше умеет, сидети будет выше, бы и барзо нищ был который меньш умети будет на подлейшом месци сидети мает; реченно бо: имящему везде дано будет.

4. Богатый над убогим в школе нечим вышшии не мают быти, только самою наукою, плотию же равно вси, все бо есми о христе братия,

53

главы единой уды, ни един же уд, око руце и рука нозе рещи и может не требе ми еси.

5. Учити дидаскал и любити мает дети вси заровно, як сынов богатых, так и сирот убогих, и которые ходят по улицам живности просячи, як который ведле силы научитися может, толко не пилней единого нежли другого учити, писано бо: всякому бо просящему у тебе дай и хотящему у тебе взяти не возбрани, хощу бо всем спастися, и в разум истинный прити.

6. Сходитися мают отрочища до школы на годину певную, то есть дня великого на девятую годину, абы все стали, также тыж и инших дний менших, як постановит дидаскал, и пущати их по науце до дому в певную годину; писано бо: все да действуем в славу божию и в подобное время.

7. В кождый поранок мают пилне смотрити дидаскал, если которого бы отрока небыло, мает по него послати зарази доведатися причины, для которой не пришел, если ся не забавил инде игранием, или ся дома обленил, или над потребу спал, и за тым бы до школы непришел, доведатися всего и привести его мают; бо писано: иных страхом и нуждею спасай.

8. Рано ся зшедши вси на годину назначеную не мают початись учити, аж молитвы и предсловие обычны проговорят; речено бо: в начале дела твоего бога поминай.

9. В школе мают быти дети розделены на трое: едны которые ся будут учити слов познавати и складати, другии который ся будут учити читати и на памят многих ся речий учити, третий ся будут учити читаючи выкладати, розсужати и розумети; рече бо Павел святый: егда бех младенец, младенческая мудрствовах и смышлях, егдаж достигох в муж совершен, млека не потребую.

10. По рану напервее по молитвах мают мовити каждый вчорашную науку свою, и писмо свое што дома писал, выклад науки своей показовати мает и потом учитися мают дробле, псалтыри или грамматики з розвязованям ей, и иным многим потребным наукам, яко обачите на тот час ведлуг потребы.

11. По обеде хлопци мают писати, сами на таблицах кождый свою науку выданую им от дидаскала, кроме малых, которым сам винен будет дидаскал вписати, а в школе научившись от трудных слов их спытовати мает един другого, то есть диспутоватися, а до дому отходячи стих подтвердити, абы у вечер из школы пришедши до дому дети умели пред родичми своими или посторонныи дети всякого стану живучи в господе пред господарем своим науку, што в школе учили, прочитати повинни з выкладом по обычаю науки школной, а штс учили того дне мают у вечер дома написати и до школы принести порану показати пред дидаскалом своим, дабы всякый плод науки познавался; всяко бо древо от плода познавати подобает.

54

12. Повинен будет дидаскал учити и на писме им подавати от грамматики, реторики, диалектики, мусики и от прочих внешних постов и от святаго евангелия, от книг апостолских, вся бо елика писана суть к нашему наказанию писана суть.

13. В субботу с поранку мают поновляти всех речей, которых ся учили през тыждень, а по обеде их учити мают пасхалии и лунного течения, и личбы, и рахованя, или мусик церковного пения; вся бо писания богодухновенна и полезна суть к научению.

14. По вечерни в суботу мает дидаскал з детьми намовлятися час немалый болше ниж в дни иные, учачи их страху божему и обычаем встыдливым младенческим яко мают быти во церкви против богу, дома против родичов своих, и инде иным, цноту и встыд заховывати, богу мовлю и его святым честь и страх, родичови и дидаскалови послушенство, посполите против всем покору и уваженя, собе самому встыд и цноту. И тые речи знову вливаны в детинку мают быти, на што им и памятного мает не боронити по чаши школнои; писано бо есть: любяй сына прилежнее наказует, а нелюбяй щадит жезла; и паки; отрочатю безумие на сердци привязано, жезлом же изженеши е, новое бо вино в мехи новые вливают и сбое соблюдет ся.

15. В неделю и в праздники господския со всеми мает дидаскал поки пойдут до литургии розмовляти и их учити о святе и празнику том и учити их воле божой, а по обеде евангелию и апостолу празника того мает всех научити: блажен бо, рече, поучаяйся закону господню день и нощь.

16. Двох или четырех хлопцов на каждый тыждень иншим порядком мают на сохранение выставляти, с чого ся ни един вымовляти не может, гды на него черга прийдет. Дело их будет раней до школы прийти, школу помести, в печи затопити и у двери сидети, а который выходят и входят, о всех ведати, и который ся бы неучили, пустовали, или в церкви нерядне стояли, или до дому идучи обычайне бы ся незаховали, написовати и оповедати их мают; речено бо: блюдетесь како да опасно ходите, не яко немудры, но яко премудры искупующе время, яко дни лукави суть.

17. Кгды бы тыж хлопец в един день до школы ходил, а другий занедбовал, и так едно час бы собе тратил в речи при школе, такого болше неприймати, бо и барвер кгды бы хорого в един день лечил, а в другий занедбал, вместо лечения в болшую бы хоробу его приправил, рече бо: всякого брата не по чину ходяща отрицайся.

18. Отцеве о детех их или господареве о порученных им детех сторонных мают быти упоминаны от дидаскала и от братии строителей школных, абы дети в домех ведле порядку науки школнои справовалися, цвиченя и людскость повинную часов своих показуючи всякому стану. А если бынешто науце спротивного в детех ся найдовали досведчено мает быти. Если бы дидаскал непилностию якоюж или родича или господаря непорядком своим в науце и обычаех добрых бы прешкажали, мает то быти повинному присужоно.

55

19. Кгды бы тыж кто хотел от дидаскала сына своего на потребу иную взяти, теды небезочне, а не през кого иного, толко сам своею особою и при том человеку едином, или двома, при которых его отдал на науки взяти его мает, абы ся тым уближена не деяло, учню и ему самому за непорядное поступованя, так теж и дидаскалови, от которого бы не отповедне учня взял, гдыж тот порядок вси иные ремесници мают, кгды при людех и порядне не толко сына зле и слугу до ремесника приказуют, и потом гды ся чого научит, тым барзей занехати того нехотят, многих зобравши статечность и терпеливость родичов и его залецают, отколя и маистрови великая потеха, кгды видит учня не подлейшего, што далеко болше в школах и людех христианских мети потреба; писано бо: всяк делаяй злая не приходит ко свету, творяй же истину, грядет к свету, да явятся дела его яко о бозе суть содеянна.

20. Если бы и сам учитель или от ученик некто был творцем речий тых, ихже закон неповелевает, но обаче и претит, сиречь, блудник, пияница, тать, кощунник, нерадив, сребролюбец, клеветник, величавый, таковый не толико учителем, но ниже жителем зде отнюдь да не будет; да не соблазните, рече, ни единого от малых сих верующих в имя мое, поне сам сопротивен сый заповедем господним, как инех уцеломудрити, и на ползу наставити может. Сам бо господь рек: не можете добре глаголати зли суще; и паки: всяк лозу нетворящу плода добра посекают и в огонь вметают. Известно ведуще убо, яко вси имами предстати судии нелицемерному христу богу, иж имать воздати комуждо по делом его, обем убо, яко трудивши ся, в подаянии силы слова, обем же яко земле блазе семя приемлющим, и сторичный плод паки иным приподающим, обояж пиюще премудрости воду живу от источника неисчерпанного и струя приснотекущаго от святаго утешителнаго духа, ту бо лучше есть куповати паче сребра и злата, и камения многоценнаго, зане сею состоится живот человеческий.

И та есть мати, и корень, и основание небеси и земли, морю и всем безднам, еюж обладающу непостижимому богу творцу всяческих, и открывающу и дарующу младенцем.

56